Það er komið að enn einum tímamótunum bæði hjá Lilju Mósesdóttur, formanni SAMSTÖÐU flokks lýðræðis og velferðar, og flokknum sem hún hefur leitt lengst af frá stofnun hans.

Lilja er á förum til Noregs þar sem hún mun starfa við rannsóknastofnun í Ósló á sviði vinnumarkaðs- og velferðarmála frá 1. október n.k. Aðspurð segist hún hlakka til að takast á við ný verkefni og nýtt tungumál í samfélagi sem er opið fyrir gagnrýnni hugsun. Lilja vill koma á framfæri þökkum til samherja sinna og allra þeirra sem stutt hafa málflutning hennar undanfarin ár og tekið þátt í baráttu SAMSTÖÐU.

Stjórn SAMSTÖÐU vill nota þetta tækifæri til að óska Lilju velfarnaðar á nýjum vettvangi og þakka henni framlag til framsækinna stjórnmála í þágu þjóðarinnar en harmar jafnframt að ekki hafi verið meira rými fyrir baráttu af því tagi hér á landi.

Rakel Sigurgeirsdóttir, sem er varaformaður í stjórn SAMSTÖÐU, mun taka við formannsembættinu í flokknum við brotthvarf Lilju.

Mynd tekin á stjórnarfundi SAMSTÖÐU sem haldinn var í lok júlí sl. Talið frá vinstri eru stjórnarfulltrúarnir: Eiríkur Ingi Garðarsson, Rakel Sigurgeirsdóttir, Jónas Pétur Hreinsson, Lilja Mósesdóttir og Hallgeir Ellýjarson.