Sex félagar í SAMSTÖÐU flokks lýðræðis og velferðar eru meðal þeirra sem settu nafn sitt undir áskorun sem hefur verið send á þingmenn nýstofnaðrar ríkisstjórnar Framsóknarflokks og Sjálfstæðisflokks. Áskorunin var send seint í gærkvöld og er svohljóðandi:

Við undirrituð skorum á ríkisstjórn Framsóknarflokks og Sjálfstæðisflokks að binda enda á frekari aðlögun Íslands að Evrópusambandinu með formlegum hætti og standa þannig við síðustu landsfundarályktanir um stefnu flokkanna í utanríkismálum.

Í greinargerð með þessari áskorun segir m.a: „Evrópusambandið glímir sjálft við gjaldmiðils- og skuldakreppu sem ekki er séð fyrir endann á.“ Í þessu sambandi er vísað til nýlegra ummæla fyrrverandi fjármálaráðherrar bæði Bretlands og Þýskalands sem „hafa lýst yfir þungum áhyggjum af stefnu ESB og þeirri áherslu sem sambandið leggur á viðhald evrunnar.“ en báðir mæltu með og stuðluðu að aðild landa sinna að Evrópusambandinu á sínum tíma.

Nigel Lawson, fyrrverandi fjármálaráðherra Breta, staðhæfir að efnahag Bretlands sé betur komið utan ESB auk þess sem útganga úr sambandinu muni hafa jákvæðar afleiðingar innanlands í lýðræðisátt. Oskar Lafontaine, fyrrverandi fjármálaráðherra Þýskalands, gengur sínu lengra þar sem hann hefur hvatt til þess að evrusamstarfið verði leyst upp til að forða frekari efnahags- og samfélagshörmungum ýmissa ríkja Suður Evrópu (sjá hér).

Afstaða fyrrverandi fjármálaráðherra er í fullu samræmi við viðvörun Yves Daccord, framkvæmdastjóra Alþjóðaráðs Rauða krossins,  frá upphafi ársins. Í viðtali við danska blaðið Politiken varaði hann við vaxandi fátækt í löndum Suður- og Austur-Evrópu vegna efnahags-kreppunnar (sjá hér). Með orðum sínum staðfestir Oskar Lafontaine ekki aðeins það sem kemur fram hjá framkvæmdastjóra Alþjóðaráðs Rauða krossins heldur dregur hann myntbandalagið fram sem orsakavald.

Þá er bent á að „aðlögunarferli Íslands að Evrópusambandinu hefur dregið dýrmætan tíma, fjármuni og orku fráfarandi stjórnvalda frá brýnni verkefnum. Nú er tækifæri til að snúa þessu við með því að binda endi á aðlögunina og byggja upp samstöðu um uppbyggingu fullvalda ríkis sem tekur sjálfstæðar ákvarðanir um grundvallarmálefni eins og efnahagsmál og milliríkjaviðskipti.“

Allir sem skrifa undir ofangreinda áskorun eiga það sameiginlegt að hafa lagt sitt á vogarskálarnar í baráttunni gegn aðild að Evrópusambandinu á undanförnum árum. Helmingur þeirra kemur úr hópi frambjóðenda Regnbogans í nýliðlnum kosningum, félaga í SAMSTÖÐU flokki lýðræðis og velverðar og félaga í öðrum samtökum sem hafa lýst sig andsnúna Evrópusambandsaðild. Þessi félög eru Heimssýn – Hreyfing sjálfstæðissinna í Evrópumálum, Ísafold – Félag ungs fólks gegn ESB aðild og Herjan – Félag stúdenta gegn ESB-aðild.

rakel@xc.is

Áskorunina með undirskriftunum má nálgast hér