Lilja Mósesdóttir hefur ítrekað vakið athygli á alvarlegri stöðu þjóðaarbúsins og bent á leiðir til að rétta hana við og bæta hag þjóðarinnar í leiðinni. Fimmtudaginn 22. nóvember síðasliðinn tók hún til máls í umræðum um stöðu þjóðarbúsins þar sem hún ítrekaði þetta enn einu sinni og benti á einu leiðina sem er fær til að tryggja lífskjör almennings.

Virðulegi forseti. Margir gerðu lítið úr skuldavandanum fyrir hrun og gera enn. Fyrir hrun prentuðu bankarnir peninga með útlánum sem þeir gerðu að innstæðum.

Útlánin voru notuð til að fjármagna kaup á hlutabréfum og fasteignum og verð þeirra hækkaði með aukinni peningaprentun. Við bankahrunið féll verð á hlutabréfum og fasteignaverð lækkaði ásamt því að útlán fóru í vanskil. Nafnverð verðbréfanna á bak við upphaflegu útlánin lækkaði hins vegar lítið og hrægammasjóðir keyptu bréfin á hrakvirði.

Í fjögur ár hafa stjórnvöld afneitað skuldavandanum. Á meðan hafa hrægammasjóðir fengið sem nemur 50% af þjóðarframleiðslu í erlendum gjaldeyri úr þrotabúunum.

Hrægammasjóðir vita að stjórnvöld geta stoppað greiðslur úr búunum. Þeir hafa því markvisst bætt samningsstöðu sína með kaupum á kröfum í þrotabú, lánveitingum til fyrirtækja, ásamt uppkaupum á ríkisskuldabréfum og fasteignum.

Herra forseti. Það er ekkert um að semja við hrægammasjóði. Við framleiðum okkur ekki út úr vandanum nema með því að ganga á auðlindir komandi kynslóða. Gjaldeyrisöflun þjóðarinnar dugar vart til að borga af núverandi skuldum, hvað þá af skuldabréfi í erlendum gjaldeyri.

Aðeins ein leið er fær. Leggja verður háan skatt á eignir þrotabúanna í gegnum til dæmis upptöku nýkrónu. Þannig verður til gjaldeyrir til að hleypa restinni út og tryggja lífskjör almennings.

Herra forseti. Hugsum í lausnum sem gefa þjóðinni von.

Ræða Lilju Mósesdóttur í umræðu um stöðu þjóðarbúsins sem fram fór 22. nóvember 2012:

Sjá tengdar greinar á bloggvettvangi þingmannsins:

Hrekjum hrægammasjóðina út úr hagkerfinu frá 8. nóvember 2012

Hrægammasjóðir vilja Ísland á hrakvirði frá 28. október 2012

Hugleysi veldur hörmungum frá 25. september 2012

Valkostir þjóðarinnar: Krónan eða evran frá 20. september 2012

Afskriftir í nafni mannúðar frá 12. júní 2012

Skiptigengisleiðin skapar samstöðu frá 29. apríl 2012

Þjóðnýting einkaskulda: Almenningur blóðmjólkaður frá 23. mars 2012