Lilja Mósesdóttir, þingmaður utan flokka og formaður framkvæmdaráðs SAMSTÖÐU, tók til máls á Alþingi eftir hádegið í gærdag undir umræðu um störf þingsins. Þar kvatti Lilja fulltrúa þingflokkanna að setjast niður og semja um þinglok og leyfa öðrum þingmönnum að ræða mál sem brenna á fólkinu fyrir utan þingsalinn.

Í ræðu sinni minnti hún á hinn ört stækkandi hóp fólks sem býr við fátækt eftir hrun og bætti við að í „hópi öryrkja, meðal eldri borgara og þeirra sem hafa verið lengi atvinnulausir eru margir svo illa staddir að þeir eiga hvorki í sig né á. Þessum hópum var lofað árið 2009 að skerðingin á bótum og lífeyri yrði bætt um leið og færi að birta.“

Í framhaldinu benti hún á að stjórnarliðar hafi fullyrt að nú „sjái til sólar en engar tillögur hafa komið fram um að bæta kjör þessara hópa.“  og ítrekaði það í lok ræðu sinnar að það ætti að vera forgangsmál að útrýma fátækt. Í þessu samhengi má minna á að stjórn SAMSTÖÐU-Reykjavík stendur fyrir fundi n.k. fimmtudagskvöld sem ber yfirskriftina: Fáktækt er fjötur sem þarf að leysa en aðalræðumaður fundarins er Harpa Njáls, félagsfræðingur.

Hún mun fjalla um fátækt á Íslandi í tengslum við stefnumótun stjórnvalda og afleiðingar fátæktar sem hafa margar birtingamyndir. Ein þeirra spurninga sem hún mun leitast við að varpa ljósi á í framsögu sinni snýr að því hvaða afleiðingar fátækt hefur á lífsskilyrði fólks. Fundurinn þar sem Harpa flytur erindi sitt fer fram að Ofanleiti 2, annarri hæð, og hefst klukkan 20:00 en lýkur klukkan 22:00.

Ræða Lilju Mósesdóttur frá gærdeginum (5. desember 2012) undir dagskrárliðnum störf þingsins.

Virðulegi forseti. Ég skora á fulltrúa þingflokkanna að setjast niður og semja um þinglok og leyfa okkur hinum þingmönnum að ræða mál sem brenna á fólkinu fyrir utan þennan þingsal.

Ég er komin hingað upp til að ræða aukna misskiptingu og fátækt í samfélaginu. Nú er svo komið að Íbúðalánasjóður þolir ekki misskiptinguna í samfélaginu sem var búin til með fullri innstæðutryggingu og verðtryggingu.

Eignafólkið greiðir upp lán sín hjá sjóðnum og nýtir sér betri kjör í bankakerfinu. Á sama tíma lendir eignalausa fólkið í vandræðum með að greiða af lánum og missir fasteignir sínar til sjóðsins vegna þess að laun hafa lækkað, kaupmáttur rýrnað og vegna verðtryggingarinnar.

Ört stækkandi hópur fólks býr við fátækt eftir hrun. Í hópi öryrkja, meðal eldri borgara og þeirra sem hafa verið lengi atvinnulausir eru margir svo illa staddir að þeir eiga hvorki í sig né á. Þessum hópum var lofað árið 2009 að skerðingin á bótum og lífeyri yrði bætt um leið og færi að birta. Nú fullyrða stjórnarliðar að það sjái til sólar en engar tillögur hafa komið fram um að bæta kjör þessara hópa.

Þess í stað er lofað að hækka bætur barnafólks til að það geti haldið áfram að borga bönkunum. Ungt, skuldsett fólk með börn er svo sannarlega í slæmri fjárhagsstöðu en það eru líka allir þeir sem eru á lágum launum og þurfa að lifa á atvinnuleysisbótum eða lífeyri.

Frú forseti. Það á að vera forgangsmál að útrýma fátækt. Það er óásættanlegt að í jafnríku landi og Íslandi búi stöðugt fleiri við fátækt.

rakel@xc.is